 مرثية في و الدي الحبيب | |
السلام عليكم ورحمة الله و بركاتة
اخواني الاعزاء أحببت أن أطرح لكم هذة القصيدة وهي مرثية في والدي الحبيب عائض بن محمد بن حكران الشهري رحمة الله واسكنة الله الفردوس الاعلا من الجنة و قد كتبتها بعد وفاته بشهرين و له الان تسعة اشهر من وفاته فاسال الله ان يتقبله برحمته و ان يجبر مصابي فيه و ارجوا من كل اخ و اخت يدخل ان يدعو له بالرحمة و الفردوس الاعلا من الحنة لانه و الله كان نعم الاب و الاخ و الصديق فلن يعوضني في فقده احد لانه كان يعني لى كل شيء في هذة الحياة رحمك الله يا والدي الحبيب.
يا بوي حنا من فراقـك محازيـن =يا يوي أنا عفـت الحيـاة الرديـة
يا بوي جعل القبر روضة رياحيـن =و جعل اللحود اللي تضمـك نديـة
وجعلـك بجنـاتً بقـرب النبييـن =تسكن بها و النفـس فيهـا هنيـة
ويرحمك ربي برحمتك للمساكيـن =ياللي بعمرك ما بخسـت العطيـة
كنت الحنون اللي يعين الضعيفيـن =لك قلب مؤمن والأيـادي سخيـة
عيشتنا عيشة ملـوك وسلاطيـن =ربيتنـا (ع) العـز و المقـدريـة
فرشـت دنيتنـا ورود وبساتيـن =وزرعت فينا المرجلـة والحميـة
فرقاك طعنة في قلـوب المحبيـن =سبحان من قـدر عليـك المنيـة
و حنا بحكم الله لفرقـاك راضيـن =و إن كانت الأحزان في القلب حيـة
محبتـك تسـري بـدم الشراييـن =مكانتـك بيـن الجفـون الطريـة
ما نشتفي لو نقضي العمر باكيـن =عليـك يـا راع السلـوم العليـة
أنا أعترف ما حنا على البعد قاوين =حكمتك يـا رب القلـوب الرضيـة
ياليت لو يرجع بي العمر شهريـن =وجلس معك وضم صـدرك عليـه
مشتاق لك يا بوي هالحين هالحين =نفسي أضمك بس والقـي ألمنيـه
بعدك أعيش اليوم أبحسبت أسنيـن =موتك تسبب للي بصدمـة قويـة
أتذكرك و أنـت بصـف المصليـن =تدعـي و تتوسـل للـرب البريـة
تدعي لنا بالحفظ يا قـرت العيـن =تدعـي لأولادك بعيشـة هنـيـة
رسمت خط الطيب وعليه ماشيـن =تركت مـن خلفـك قـرومٌ قويـة
وأبشرك أنا علـى العهـد باقيـن =ما نفترق ما دامت النفـس حيـة
و يا بوي جعل القبر روضة رياحين =و جعل اللحود اللي تضمـك نديـة
و جعلـك بجنـات بقـرب النبييـن =تسكن بها والنفـس فيهـا هنيـة
بقلم اخوكم
المرتجز
عبدالعزيز بن عائض الوليدي الشهري
التعديل الأخير تم بواسطة المرتجز ; 07-23-2008 الساعة 07:42 PM.
| 
العرض العادي
