يا سيدي ما لي على الحب سلطان
................................ انت الذي تامره بأمرك وتنهاه
كلٍ له اصحابٍ .. وربع ٍ .. وخلان
...................................ناسٍ تبي نعده وناسٍ تمناه
إلا أنت كل الخلق في حبك انسان
.................................قلبه معك دايم صباحه وممساه
ياللي وسع صدرك لنا دار وأوطان
...............................ياللي الصخى والطيب فعلك تعداه
أنت البخيل ابمنتك وقت الاحسان
...............................وانت الذي لطفه يسابق عطاياه
ما كل من فارق غدى مثل سلطان
.................................. كلٍ يبي شوفه .. وكلٍ ترجاه
لو المرض جيشٍ نطحناه بسنان
..................................ولو الكدر بحرٍ شربناه لرضاه
أنا أحمد اللي بدّل الجهل بإيمان
..................................اللي حفظ عمي وصانه وشافاه

بدر بن عبدالمحسن