شجب / واستنكار / أخبار / وجرايد = لطم خد / ونزف دمع / وجرح أمّة
باختصار الوضع ترثيه القصايد = وش لنا غير القصايد .. والمذمّة ؟!
أمّة المليار مسلم في تزايد = والتزايد في شتات .. ومن يلمّه ؟!
وجهنا اللي تفضحه كثر النقايد = آآآه ... ليته يستحي من ثقل دمّه
التوحّد / واختلافات العقايد = التفاهه / والقرارات المهمّة
اضطهاد / وانتهاك / ومجد بايد = احتقار / وانكسار / وموت هِمّه
استغاثات الطُهُر .. بين الوقايد = واستباحات الشرف .. من دون ذمّة
واليتيم اللي تجرّع كل كايد = شف دموعه بلّلت أطراف كمّه
والرضيع اللي رضع ثدي الشدايد = يـ.. الله إنْ تحسن عزاه فْـ.. حضن ( أُمّه )
والنحور اللي تزيّنها القلايد = ما لقت صدر الحنان اللي تضمّه
واللسان اللي غدا عنصر محايد = لعثموا له صرخته .. في وسط فمّه
والعدو اللي علينا دوم سايد = من يهمّه لو تمادى .. من يهمّه ؟!
بشّروه إنا نكبّر فـ.. الوسايد = وإنا نحلم بالوصول لْكل قمّة
وإنا نرثي الوضع .. في حفْنة قصايد = عظّم الله أجْرنا في موت أمّة !!