سر يا قلـم واكتب علـى مـا طـرالـي
عـبّرعـن الضيقـه بمضمـون الاشعـار
سر وانت في الدنيا حكيم ومثـالي
وانت الذي تهدم وتبني لك ادوار
يا صـاحبـي لحن المشاعر يلالي
تعال ناخذ في دجى الليـل مشوار
نذكر محطات السنين الطوالي
ناخذ لنا من صفحة العمر تذكار
نرقى على متن السحاب الثقالي
ونهل دمع الفكر صافي ومدرار
والهاجس اللي من حروفه تمالي
قدر معاناته وخذ منه الاشوار
انشـده عن ذيك السنين الخـوالي
ايام ذقنا من حلاها والامرار
و اللي شوى قلبه من الهم صالي
اعـزف مـواويلـه علـى صـوت قيثـار
وانصـب لقيـفـان الهمــوم احتـفـالـي
العـب علـى طـيرانهـا لعبـة الـزار
واختـار مـن بـين النــوادر جـزالـي
اصـفّ لك مكنـوزها وانـت تختــار
بالسـوق جمّلني ترى السـوق غالي
ترى المـزاين دوم تـفـرق بالاسعــار
وانـزل كمـا شامـان وقـت النـزالـي
حـد ٍ بريـع وفي اللـقـا سيـف بتــار
وان جيت اسـولـف لك عن اسباب حـالي
خذ من عيون الهم لك زاد واحبار
الصدر ضايق حيل والصـبر طالـي
والـوقـت لعـمـار المـخـاليـق هــدار
وانا اللـي اتعـبـنـي وزاد انشـغـالـي
حـظ ٍ كسير ووقـت قـاسـي وجبــار
وهمـوم تشعـل فـي الضـمير اشتعـالي
وسط الضمـاير يشتعـل واهـج النــار
ما جـتـني الـدنيـا علـى طيـب فـالـي
تبـدي لـي بوجـه ٍعـبـوس ٍ وغــدار
كـنـت ازبـن الهقـوه عـلـى رجم عالي
واكسر مجاديف الزمن جد واصرار
اثر الزمن يثـلم سيـــوف الرجــالي
والناس تحكمها صواديف الاقـدار
ما كنت احَسْب حساب سـود الليـالي
ولا..عْـوى سرحان فـي جـرد الاقـفـار
والطـيـحه اللـي تعـتـبـر راس مـالـي
آمـال مفـقـوده وحلـم الهـوى طــار
مدري سببـها وقـت ما قـد صفـالـي
والا السبب فـي حظـي ايدينه اقصـار
اســـج بفـكـاري يـمـيـن وشـمـالـي
اقـراء كفـوف الوقت والوقـت دوار
اثـر الـزمـن مالـه رفـيـق ٍ مـوالـي
اذا هـدى سـاعه يبـاغتـك بعـصـار
بصـبر لـو ان الصبر فـاق احتمالـي
وانـا عـلـى ما قيـل صـامـد وصبـار
يالله يـا المعبـود يـا ذو الجلالـي
ياعـالمـن بحـوالـنـا سر وجهـار
تجلا همـومن فـوق صـدري ثقالـي
تطـلع وتـنزل كن فـ القلب منشــار
انت العـزيز اللـي عليـه اتكـالــي
وانت المـلاذ بوقـت يسر ٍ وبعسـار
وفي الختـام افضـل كـلام ٍ يقـالي
على النبي صلوعـدد وبل الامطار
وسلامتكم
.
سر ياقلم@ 
العرض العادي
