حنّا بنات الوطن وشموع ديجوره= وحناّ بنات الوطن وأحلى سعوديه
منابت المجد وأصل المجد والصوره = مرابط العز وسبوق النداويه
منابت الملح وأصل الورد وزهوره = مكاسر العود والنفحه سماويه
عذبات الانفاس وأغلى المسك وعطوره = نفحات الاشجان والنسمه ربيعيه
فوح الخزامى بروض ٍ قيل ممطوره= قدِ علّها مع بكور الوسم وسميه
حنّا بنات الوطن سكناه وخدوره = حنّا بنات الوطن والثقل ماريّه
ياللي تعذرب بنا يمناك مكسوره = ماكن فينا لك أم وبنت وأخيه
أفكارك السود مشبوهه ومبتوره = وعلومك العوج ملفوفه وملويه
تلف وإلا تزيد اللف لك دوره = العلم بالهون والحاجات مقضيه
خذها على نور والرايات منشوره = بالعدل والميز مكتوبه ومقريه
خذها وباقي بها وقفات مذخوره = تجيك من فوق وإن حبيّت رديه
بنت الوطن ياضعيف الرأي مذكوره = بالخير والطيب مذكوره سنافيه
من أول الوقت يالمسكين مشهوره = بالفكر وأحلى التواصيف النسائيه
بنت الوطن ياقصير الشوف معموره = بالعطف واللين وتزيده بحنيه
إن كان بالكون قالوا عينه وحوره = بنت الوطن من عظيم الشان حوريه
بنت الوطن من جمال الخلق مستوره = الطبع هادي ووقت الجد جديّه
ممكن تقوّم بوجه المعتدي ثوره = والأصل تكوينها ثابت حياويه
شيهانة اللحظ بنت الريح منثوره = ملمومة الخصر بنت الذيب ريميه
يعني حجازية العينين مخبوره = نجدية الخصر واللمحه خليجيه
ريحانة الفل بأرض الفل مبذوره = يعني عسير وعبير أحلى عسيريه
وقاّدة الحس بالاشواق دكتوره = يضيق صدر الزمن تبقى شماليه
تكتب حروف الوفا وتسّن دستوره = بحروفها إخلاص وإن حبّت هواويه
يعني هي الجو مع بيداك وبحوره = من رأسها للقدم بالزين مكسيه
سمعت ياللي حسبته لعبة الكوره = بعض السواليف لا سقته عماويه
لا ضيّع الدرب مثلك وأخلف شعوره = ندلّه الدرب والاعمال بالنيه
ياخاوي الفكر والعدلات مقبوره = في صدرك اللي لبس بلواه صدريه
مغرور مغرور مثلك ناس مغروره = بمركب النقص والاوهام مبليه
منادمين الخطا ملفاه وطيوره = الفكر خياّل والساحه خياليه
من الحماقه لبسك الكبر وشروره = والحمق رمح الردى وحدود هنديه
تسكن زواياك والطرقات مهجوره = ياغراب خل الحمام إنسى خطاويه
لو تفرد الريش يالطاووس مأثوره = عواقب الكبر يالمغرور سلبيه
ياسيّد الغطرسه ياقاصر شبوره = ياعاشق الذات عشق الذات نفسيه
سمعت رد الاصيله وإفهم سطوره = بسيط منساب والاوزان شعبيه
وإسلك طريق الهدايه وإحفظ السوره = السوره اللي على المعنى ومكيه
وإن كان نفسك على الشينات مجبوره = والنار ياميّت النيران مطفيه
أجيك أنا بنت هالديره ومأجوره = وتشوف بنت الوطن والجمره الحيه
أجيك وتشوف بنت السبع مسعوره = وأخرك معروف والدعوى طبيعيه
الوقت معروف في زنات دبوره = يخرّب العش وهو العش راعيّه
ماهي بشرَبه من الغوري وشابوره = بعض الحكاوي وفيه حدود محميه
خذها ولا أقول لا رديّت مشكوره = من واجبي لا دفعت الشر والسيّه
بأول خطوط الدفاع وراس طابوره = أصد وأرد والصدّه هجوميه
خذها وأنا بنت قوم المجد وحضوره = مني وأنا من بنات الدار نجديه
من نجد ماجيت أنا المغرب وناطوره = وماجيت حد اليمن ما كنت مصريه
خذها وأنا ماعرف الحمراء ولا شتوره = ولا جيت عماّن وإلا كنت شاميه
ولا نيب من بابل النهرين وآشوره = وإلا بعد من بنات الشرق شرقيه
خذها وأنا من عظيم الشان منصوره = من نجد ماقول أنا شقراء وغربيه
أعيّد العيد ما عوشر بعاشوره = الدين الاسلام والمنهاج سنيه
خذها ونفسي على المسفار مأموره = والنفس معروف مأموره ومنهيه
ماقلتها من غضب بالوقت مقهوره = على الملا وإن بغيت السلم سلميه
خذها وأنا بنت روس الطيب وصقوره= الجد قحطان والمنشأ قصيميه

هذا رابط التحميل.. وأنتظر ردودكم يابنات الجنوب



انشاد "عمر المنسلح "


عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

.................................................